بحبها ... حب عنيف ... لأ ... ازاي حد يوصف الحب بكلمة زي دي؟ ... عنيف؟! ... لأ دا حب كبير ... حتى كبير دي كلمة وحشة ... أنا بحبها حب صغير ... ببراءته ... بخجله
حب كله إخلاص وتضحية ... حتى التضحية كلمة غلط ... تضحية ليه؟ ... اللي بيضحي دا بيعمل حاجة صعبة عليه ... أو مش عايز يعملها ... لكن اللي أنا بعمله لا صعب ولا مش عايز أعمله.
كتير قالولي أزاي تسيبلها عربيتك؟ ... مقابل ايه؟ ... طبعاً مقابل الفرحة اللي باشوفها في عينها ... شوفت في عينيها فرحة ماشوفتهاش قبل كده ... أبقى كده ضحيت؟ ... تيجي ايه العربية قدام اني أشوف الضحكة دي؟ ... تيجي ايه قدام اني أكون أنا السبب في الضحكة دي؟
حبيتها من ساعة ما وعيت على الدنيا ... مش فاكر حاجة عن نفسي قبل ما احبها ... فاكر أيام ما كنا بنقعد على البحر في الصيف في مرسى مطروح ... محاولاتي دايماً اني أبقى قريب منها أكتر من أخواتي ... فاكر اعجاب كل الناس باختها اللي أحلى منها ... بس في عينهم هم بس ... هي ملكة قلبي المتوجة.
كتير بيقولوا الحب مشوار ... بيمشي في الحبيبين سوا ... دا حقيقي ... مشوارنا ابتدى بمشوار المدرسة ... من بيتي لما أقابلها وهى نازلة من الدور اللي فوقينا ... ننزل السلم سوا ... ونروح المدرسة سوا
ربع ساعة بنمشيها سوا ... أمسك ايدها واحنا بنعدي الشارع ... وتشد ايدها من ايدي لما نعدي ... وأنا اسيب ايدها بسرعة لا تتكسف ... مع أن بيبقى نفسي ماسيبهاش تاني ابداً ... ونوصل المدرسة وأفضل طول الحصة الأولى سرحان في مسكة ايديها ... وسرحان في الفضول والفكر ... يا ترى هي كمان سرحانة؟ ... يا ترى كان نفسها أمسك ايدها أكتر؟ ... يا ترى فاهمة حاجة في الحصة بتاعتها؟ ... يا رب تبقى سرحانة زيي.
في ناس بيقولوا الحب حلم ... دا كمان صحيح ... حلم بالمعنيين ... معنى الحلم كطموح ... و كحلم أثناء النوم ... يعني أنا طول ما أنا صاحي وهي مش معايا بحلم ... يا ترى الفرح حايحصل فيه ايه؟ ... نجيب مين يغني؟ ... مرتبي حايكفي يخليني أعيشها في السعادة اللي تستحقها؟ ... أنا عارف انها بترضى بأي حاجة ... وبتحب أي حاجة مني ... بس أنا برضه بيبقى نفسي أجيبلها أكتر من اللي هي عايزاه ... هي فرحت أوي بالحلق اللي جبته الشهر اللي فات ... مع انه بتمانية جنيه بس ... حبته أوي ... بتلبسه كل يوم ... وفرحت بالتوكة اللي عليها ميني ماوس ... مع انه يليق أكتر على واحدة أصغر منها.
بس أنا برضه نفسي في أكتر من كده ... يا ترى ايه أنواع الثلاجات الكويسة؟ ... ايه أنواع السيراميك؟ ... يا ترى في نجف أحلى من اللي عندنا في البيت؟ ... عشان مش بحب ذوق ابويا في النجف ... طب يا ترى حاتعجبنا نفس الحاجة؟ ... مش مهم تعجبني أنا ... المهم هي تبقى مبسوطة ... لو عليا اجيبلها نجوم السما في كريستالات بدل النجف ... اجيبلها في الفرح أوركسترا بتعزف ضحكتها ... اجيبلها عربية مرسيدس بدل العربية اللعبة اللي سيبتها عشانها ... المهم تكون بتحبني أصلاً.
لو نجحت السنادي بمجموع كبير في الابتدائية ... ممكن أتشجع واصارحها ... وأقول لها أن التوكة والعربية والحلق جبتهم عشان بحبها ... وأني محوش أربعين جنيه عشان أجيبلها المطبخ اللي بالبطاريات اللي هي عايزاه في عيد ميلادها.
لو بتحبني ... حاعملها كل اللي هي عايزاه ... بس أعمل كويس بكرة في الامتحان ... وأشوفها بعديها في بيتزا هت.
12-12-2008
why no one commented onthis bolg? I really liked it, delwa2ty 3ereft enta leih makontesh ma3rouf 2awy ayam el madrassah 3ashan kont 3ala toul mash3'oul bel tafkir we el a7lam ;) rabena ye5alikou le ba3d :)
ReplyDeletebaree2a awyyyyyyyy, we afkarha 7elwa awyyyyyyyyyyyyyy, bas moshkelty fiha en el walad da lessa soghayar ennama kalamo kalam wa7ed kebeer, e7sas wa7ed kebeer we howa beyefteker tofolto.
ReplyDeletea7la parts:
el tadweer 3ala wasf lel 7ob wel kalemat el mesh monasba, le7ad ma wesel enno 7ob soghayar. wasf ra2e3
7ettet ta3deyet el share3 (2al eh bey3addiiiiny)
7ettet el sara7an fel fasl we ya tara heya fahma 7aga, di gamda geddannnnn
we tab3an el hadaya wel 40 geneih dole maskhara.
All in all 7elwa we malyana masha3er
Heba Helmy says:
ReplyDeletebaree2a awyyyyyyyy, we afkarha 7elwa awyyyyyyyyyyyyyy, bas moshkelty fiha en el walad da lessa soghayar ennama kalamo kalam wa7ed kebeer, e7sas wa7ed kebeer we howa beyefteker tofolto.
a7la parts:
el tadweer 3ala wasf lel 7ob wel kalemat el mesh monasba, le7ad ma wesel enno 7ob soghayar. wasf ra2e3
7ettet ta3deyet el share3 (2al eh bey3addiiiiny)
7ettet el sara7an fel fasl we ya tara heya fahma 7aga, di gamda geddannnnn
we tab3an el hadaya wel 40 geneih dole maskhara.
All in all 7elwa we malyana masha3er